Kennis en klets sessie 4

Johan Koekemoer is tans die hoof van onderrig en leer by die Solidariteit Skoleondersteuningsentrum, waar hy ʼn rol speel in die skep van ʼn verrykende onderrig- en leermodel. Daarbenewens verleen hy sy kundigheid deeltyds by die Opvoedkunde Fakulteit van Akademia, met ʼn spesiale fokus op Wiskunde. “Hierdie rolle bewys my roepingstaak in die onderwyssektor, sowel as my begeerte om ʼn positiewe impak op die onderwyservaring van die toekomstige geslag te maak ,” sê Johan.

Johan beskryf homself as ʼn toegewyde familieman, gelukkig getroud en die trotse pa van vyf pragtige kinders. Sy akademiese agtergrond is divers, met ʼn graad in Meganiese Ingenieurswese, gevolg deur twee meestersgrade – een in Opvoedkunde en die ander in Besigheidsadministrasie. “Hierdie opvoedkundige agtergrond ondersteun my toewyding aan lewenslange leer en my vermoë om my kennis van verskeie gebiede in samehang te sien.”

“My grootste roepingstaak en hooffokus is my gesin, wat die fondament van my lewe vorm met Christus as die hoeksteen. Tweedens fokus ek ook op my betrokkenheid by die onderwyslandskap, waar ek my kennis en ervaring benut om innoverende oplossings te ontwikkel. Hierdie oplossings is daarop gemik om kinders toe te rus met die nodige vaardighede en kennis om te floreer in ʼn wêreld wat voortdurend verander. My benadering tot opvoeding is holisties en toekomsgerig, met ʼn sterk oortuiging dat opvoeding die sleutel tot die ontwikkeling van veerkragtige, aanpasbare en suksesvolle kinders is,” benadruk Johan.